SS Byggir skilaði inn tveimur tilboðum í sl. viku. Annars vegar tilboði í frágang innanhúss í Naustaskóla og hinsvegar tilboði í breytingar og endurinnréttingu á Hafnarstræti 107. Þrjú tilboð bárust innanhússfrágang Naustaskóla og átti SS byggir lægsta tilboðið. 

Níu tilboð bárust frá átta aðilum í breytingar og endurinnréttingu Hafnarstrætis 107 en húsnæðið hýsir m.a. skrifstofu sýslumanns. SS Byggir bauð frávikstilboð í verkið sem reyndist lægsta tilboð. Frávikstilboðið gerir ráð fyrir að verktími styttist og verði frá 1. september 2012 til 15. mars 2013. Verktíminn styttist þá úr 54 vikum í um 26 vikur. Frávikstilboðið gerir ráð fyrir að öll starfsemi í húsinu frá kjallara og upp fyrstu þrjár hæðirnar verði flutt úr húsinu á þessu tímabili. SS Byggir telur að framkvæmd endurbyggingarinnar sé það umfangsmikil að ekki sé boðlegt fyrir verktaka né starfsfólk byggingarinnar að vinna við slíkar aðstæður í mjög langan tíma. Sem verktaki telur SS Byggir að kostnaður við breytingarnar verði lægri með þessu móti enda frávikstilboð fyrirtækisins lægra en hefðbundna tilboðið. Sá leigukostnaður sem félli á verkkaupa myndi væntanlega sparast með færri aukaverkum og styttri tíma sem verkkaupi þyrfti að kaupa verkeftirlit o.fl. Auðvelt er að halda því fram að gæði verksins yrðu meiri ef hægt væri að taka stærri fleti undir í einu lagi og hver verkþáttur fengi meira rými í verkferlinu. Það yrði mikið lagt á starfsmenn og viðskiptamenn Hafnarstætis 107 að starfa í byggingaumhverfi  í rúma 13 mánuði þar sem hávaði, ryk og annað ónæði myndi valda gríðarlegu áreiti sem aftur gæti kallað á aukin veikindi starfsfólks o.fl. Það er trú SS Byggir að þjónusta við viðskiptamenn þeirra stofnanna sem um ræðir myndi skerðast mun minna ef unnið yrði eftir hugmyndafræði frávikstilboðsins.

Kostnaðaráætlun hljóðar upp á 198.435.489 krónur.  

Það mun skýrast á næstu dögum við hverja verður samið í báðum tilfellum.

Starfsemi SS Byggir er komin á fulla ferð eftir jólafrí. Mikið er að gera hjá fyrirtækinu um þessar mundir. Fyrir utan starfsemi verkstæðisins þá eru starfsmenn á vegum SS Byggir m.a. í Undirhlíð 3, Naustaskóla, Hjúkrunarheimili Vestursíðu, Laxárvirkjun og Glerárgötu 28.

Undanfarna mánuði hefur SS Byggir unnið við að klæða og setja þakvirki á jöfnunartank við Laxárvirkjun í Aðaldal. Undirverktaki er ÁK smíði. Vinnu við þakið og uppsetningu á lóðréttum stoðum við inntaksrör er lokið og vinnu við einangrun í kringum inntaksrörið mun ljúka í þessari viku. Vinna við klæðningu á tankinum hefur reynst erfiðari en reiknað var með í upphafi. Álplöturnar eru langar og léttar og stöðugur vindur niður gilið hefur sett strik í reikninginn. En með hugviti starfsmanna og góðri samvinnu miðar verkinu nú ágætlega. Áætluð verklok eru í janúar 2012.

Í næstu viku hefur SS Byggir afhent 17 íbúðir af 27 í Undirhlíð 3. Allar 7 íbúðirnar sem fóru í útleigu eru komnar í leigu og 10 kaupsamningar hafa þegar verið gerðir. Tvær íbúðir eru fráteknar og því eru 8 íbúðir enn til sölu en þær eru á hæðum 3, 4, 5 og 6. Bílageymslan er komin í notkun og hefur komið sér vel að undanförnu, enda veturinn farinn að minna hressilega á sig þessa dagana. Óseldar íbúðir eru sýnis eftir samkomulagi.